Patakarang nagapuga sa mga Draybers ug Operators, BATUKAN!

Transport Strike ang Tubag sa Katawhan.

cagayan-de-oro-transport-strike
Likoan - Highway Junction

Karong adlawa, kusganong ipalanog sa Solidarity Of Transport Alliance in Region X (STAREX) – PISTON, ang kasuko ug singgit sa nagkalain-laing grupo sa mga draybers, gamayng operators ug katawhan dinhi sa rehiyon aron protestahan ug batukan ang dili makatarunganong patakaran ug pagpangilkil sa rehimeng US_Arroyo, dungan sa NASUDNONG HUNONG PASADA nga ginahimo usab sa tanang mayor nga syudad sa Pilipinas sama sa Metro Manila, Baguio City, Davao, Bicol, Bacolod ug Cebu.

Atol sa pangkalibutanong krisis sa ekonomiya ug pinansyal, imbes nga proteksyunan sa gobyerno ni Gloria ang iyang katawhan sa grabeng epekto niini, mas nataranta pa kini sa pagluwas sa kita sa mga langyawng korporasyon samtang maoy gipapas-an ug gihimong gatasan ang katawhan aron mosalbar sa nahiagumang krisis.

Pinaagi sa Oil Deregulation Law, padayong gitagaan og ligal nga lisensya ang mga higanteng kartel sa industriya sa lana, ang BIG 3 (Shell, Petron ug Caltex), sa pagpasirit og pagtaas sa presyo sa produktong petrolyo ug pagkawkaw og dagkong tubo gikan sa mga draybers. Dili ra sa Cagayan de Oro halos P5 na ang umento niini sa lima (5) ka beses nga pagtaas sukad Mayo niining tuiga samtang hinay ang pag-rollback sa presyo niini taliwala nga barato nalang ang presyo sa pangkalibutanong merkado.

Samot pa ang pagkalubong sa mga draybers sa daghang balayronon sa pagpatuman sa Department of Transportation and Communications Department Order 38 ug 39 (DOTC DO 38 & 39) niadtong Oktubre 7, 2008. Ang DO 38 nagtakda sa dugang nga minimum 43% sa singil sa pagkuha sa lisensya sa tanang klase nga drayber ug bisan pa konduktor sa bus. Samtang, ang DO 39 nagalangkob sa pagpadako sa mga multa sa mga nakalapas sa palaod trapiko – “reckless driving”, simpleng “wearing slippers”, disregarding traffic sign, pag-angkas sa pasahero ug bisan unsa nalang nga rason aron himuong gatasan ang mga draybers.

Dili na bag-o ang mga multa sa draybers. Dili na maihap sa kadaghan ang mga balod trapiko ug daghanan pud ang mga gitukod nga ahensya aron sa pagpatuman niini. Ginagamit kanunay nilang rason ang pasulbad sa problema sa trapiko apan sa kanunay pakyas kini tungod kay wala man niini gitagad ang ubang problema sama sa guba-guba nga kalsada samtang nagapadayon and kaylap nga pangurakot sa mga proyekto sa gobyerno.

Mao nga klaro nga ang pagpataas sa multa kabahin sa “money-making scheme” sa gobyerno aron masalbar ang bangkrap nga ekonomiya sa nasud. Dugay nang ginahimong gatasan pinaagi sa uban pang mga balyronon susama sa Road User’s tax o Motor Vehicle User’s Charge diin mikita ang gobyerno og P51 bilyon sulod sa pito lamang ka tuig. Anaa pa ang 12% EVAT nga ginapatong sa mga produkto sa lana. Sakwentada sa STAREX, pinaagi sa gipayungang mga lokal nga asosasyon sa mga drayber sa rela diri sa Cagayan de Oro, mukabat og P54,928 matag adlaw ang moadto sa bulsa sa lokal nga pangagamhanan pinaagi sa EVAT ug sa mga jeepney drayber adunay P576,900 ang mohothot niini matag adlaw.

cagayan-de-oro-transport-strike-starex
Marcos Bridge, Cagayan de Oro City during transport strike

Apan taliwala nga dako ang kotong nga nakolekat gikan sa mga draybers, wala mibalik ang pondo sa katawhan ug sa mga draybers sa porma sa batakang serbisyo ug tarong nga programa alang sa sektor sa transportasyon.

Mibarog ang STAREX nga dili makalmpos sa bulok nga sistema sa transportasyon ang katawhan hangtod dili mawala ang batakang problema sa ekonomiya sa atong nasud.

Karong umaabot nga SONA, ipagarpar na pag-usab ni Arroyo ang mga bakak ug ilusyon sa kuno “kalambuan sa ekonomiya” taliwala nga ang tinuod nga kahimtang sa katawhan mao ang pag-ilad sa grabeng kagutom, kalisod ug kawad-on. Ang mga draybers muuban sa katawhan sa pagprotesta sa unsa mang desperadong lakang sa Malacanang sa pagpalungtad sa gahum ni Gloria ug mga alipoes niini pinaagi sa CHA-CHA o di kaha sa papag deklara og EMERGENCY POWER (MARTIAL LAW) aron kunuhaykgangon ang hulga sa terorismo atol sa serye sa mga pagbomba nga gakahitabo sa Mindanao nga klarong ang nagpaluyo ug utok niining tanan sila ra sab sa Malacanang.
Batakarang serbisyo sosyal sama sa pabalay, edukasyon ug panglawas ang gikinahanglan sa mga drayber, gagmayng operators ug katawhan dili ang dugang paglisod-lisod ug pagpahimulos.

Labaw sa tanan, padayon ang pakigbisog sa mga draybers sa pagpatuman sa nasudnong industriyalisasyon ug tinuod nga reporma sa yuta alang sa bagang ihap sa katawhang nag-antos ug gipahimuslan.

Ibasura ang mapahimuslanon nga DOTC Dept. Order 38 ug 39!
Drayber ug katawhan: salmot sa hunong pasada!
Undangon ang pagpangotong sa rehimeng US-Arroyo sa katwhan!
Makigbisog alang sa tinuod nga kagawasan ug demokrasya!

Solidarity of Transport Alliance in Region (STAREX – PISTON)

Leave a Reply